İşverən

bu yazı onu özünə götürənlərə ithaf olunur

Gənclərin işsizlik problemi həll olunmaq üzrədir: Cabbar Savalanlıya 2 il yarım, Bəxtiyar Hacıyevə 2 il müddətinə iş verilib. Tural Abbaslı və başqa gənclər 3 il müddətinə işlə təmin olunmaq üçün 3 aya yaxındır ki, Kürdəxanıda sınaq müddətindədirlər. Əvvəlcə onlara 2 ay sınaq müddəti ilə iş vermişdilər, sonradan sınaq müddəti daha 2 ay uzadıldı. Görünür, sınaqdan yaxşı çıxmayıblar, 3 illik iş almağa layiq görülməyiblər hələlik. Fəqət ümid hələ ölməyib, özlərini yaxşı apar(ma)salar onlara da iş veriləcək.

Öz aramızdır, iş məsələsində Bəxtiyar Hacıyevə haqsızlıq olub, adam Okeanın o tayına adlayıb, Harvardı oxuyub gəlib, cəmi 2 il iş veriblər. Müddətin az olması bir yana, üstəlik iş yeri də əyalatdədir. Bakıda olsaydı, dərd yarı idi. Öz günahıdı, ağlı vardı, gəlməyəydi.

Sovet dövründə əmək qanunvericiliyi iş axtaranı işlə təmin edən adama “işverən” deyirdi. Müstəqillik qazandıqdan sonra, deputatlarımız hesab etdilər ki, işverənlik milli mentalitetimizə ziddir, işverənin adını dəyişib işəgötürən qoydular. Adı ilə böyüsün!

Nə isə, mövzudan uzaqlaşmayaq. Yenə də kəmiyyət keyfiyyəti üstələyib, iş yerlərinin çoxu mövsümi xarakterlidir. Mövsümi işlərdə müddət 15 sutkadan artıq olmur. Amma yaxşı tramplindir mövsümi işlər. Özünü doğrulda bilsən, uzun müddətli işlə də təmin olunarsan. Tural Abbaslı bu cür qabağa getmədimi? Bekarçılıqdan məhəllə uşaqlarına qoşulub “Tarqovı”da qışqır-bağır salıb camaatın istirahət hüququn pozurdu. Polis onu və dostlarını “məşğulluq mərkəzinə” apardı və orada Turala da, dostlarına da 8 sutka iş verdilər. Əvvəlcə cığallıq elədi, şikayət verdi ki, mən 8 sutka istəmirəm. Şikayəti təmin olunmadı. Dedilər, hara göndərsək, ora da getməlisən. Amma Turalın da dilinə görə dilçəyi var, özünü necə doğrultdusa, 8 sutka  başa çatandan sonra cəmi 2 həftə işsiz qaldı: onunla 2 ay sınaq müddəti olmaqla  3 illik “müqavilə” bağlandı.

Bircə bu Avropa işə qarışmasa, işlər yaxşı olacaq. Eynulla Fətullayevin misalında bunun acı nəticəsini görmüşük. Bir neçə yerdən iş təklifi alan Eynulla fərasətli tərpənib işverənlərin hamısı ilə dil tapıb, üst-üstə 8 il yarım iş almışdı. Avropa tez şübhələnib işə qarışdı, sənəd-sünədi təftiş etdi. Aydın oldu ki, Fətullayev işverənləri aldadıb (jurnalistdəki fərasətə bax haa, hamını aldadıb), saxta sənədlərlə 8 il yarım iş alıb. Saxtakarlığa dözümsüz Avropa tez bir məhkəmə qurub Eynullanın dərhal işdən azad edilməsi barədə qərar verdi. Yenə də sağ olsun öz işəgötürənlərimiz! Eynullanı işsiz qoymadılar, onunla 2 il yarımlıq əmək müqaviləsi bağlayıb başqa işə keçirdilər, amma bu Eynullaya layiq iş deyildi. Bu dəfə Prezident işə qarışdı və Eynullanı layiq olmadığı işdən azad etdi! Təşəkkürlər, cənab Prezident!

P.S. Bu yazıdan sonra mənə iş vermək lazım deyil. İşim var, vəkiləm!

24.06.2011-ci il.

Sizin Cəbiş müəllim

(bir pərdəli siyasi dram)


 Namiq internetdə müxalifətin mitinqinin dağıdılmasını izləyərək  fikirləşirdi  ki, bəs, atası niyə mitinqə getməyib. Axı, Makedon ona demişdi ki, sənin atan müxalifətçidir! Namiqi fikir götürmüşdü, əgər atası müxalifətçi deyildisə, niyə vəzifəsi yox idi, müxalifətçi idisə, niyə mitinqə getməyibdir? Yox atası, dəqiq müxalifətçi idi. Hətta, məktəb direktoru Cəbiş müəllim də Namiqin atasına “bəy” deyə müraciət edirdi. Amma ona başqa “bəy”lərdən artıq hörmət edirdi. Burada nə isə anlaşılmazlıq vardı. Namiq beynindəki fikirlərdən yaxa qurtarmaq üçün atasının iş otağına keçdi. Atası oğlunun gəlişini görüb əlindəki qəzeti kənara qoydu və ona çay gətirmiş həyat yoldaşına da işarə etdi ki, otursun:
- Gəl, oğlum, gəl otur. Dərslərini eləmisən?
-...
- Niyə bikefsən, oğlum, nə olub?
- Ata, sən müxalifətçisən?
Ana:
- Naaamiq...
Ata:
- Bu hardan gəlib sənin ağlına?
- Hamı gedib vəzifəyə, Makedonun atası, Səfurənin atası, təkcə sən getməmisən, deməli, sən...
Ana yenidən:
-Naaaamiq!
Ata:
- Sən bilirsən ki, mən siyasətlə məşğulam, bitərəfəm... onu da yaxşı bilirsən ki, bitərəf siyasətçilər olmasa ölkəmizdə nə demokratiya olar, nə də insan haqlarına hörmət qoyular. Bir də bitərəf siyasətçilərə hamıdan sonra vəzifə verirlər, özü də hamıya birdən yox, tək-tək, vaxtı çatanda mənə də vəzifə verəcəklər. Görünür hələlik burda lazımam. Başa düşdün?
- Aha.
-Get yat! Bir də bunu sənə ona görə deyirəm ki, həmişə yadında qalsın. Vəzifəyə getməyib bitərəf siyasət yürüdənlər müxalifətçi deyil. Müxalifətçi o adamlara deyilir ki, radikal olsun, gecə-gündüz iqtidarı söysün. Nə isə, get yat, daha gecdi.


P.S. Namiqin atası həmin gecəni səhərədək yata bilmədi. Uşağın sualı yaman təsir eləmişdi ona: doğurdan da, axı ona niyə vəzifə vermirdilər? Axı, ondan yaxşı deputat olardı...




17.06.2011-ci il.

Universitetin "zaminliyi"

İttiham tərəfinin protokoldan kənar, tam səmimiyyətlə "hüquq dərsi" adlandırdığı, haylı-küylü istintaq prosesi, müdafiə tərəfinin etirazlarına baxmayaraq, tələm-tələsik yekunlaşdırılaraq iş məhkəməyə verildi. Söhbət Sumqayıt Dövlət Universitetinin (SDU) tələbəsi, Azərbaycan Xalq Cəbhəsi Partiyasının (AXCP) üzvü, gənc fəal Cabbar Savalanlının barəsində açılmış cinayət işindən gedir. Onu qanunsuz olaraq narkotik vasitə əldə etməkdə və istifadədə təqsirləndirirlər.


2 ay ərzində, hər dəfə saatlarla davam edən saysız-hesabsız istintaq hərəkətlərində və məhkəmə proseslərində verdiyimiz onlarla vəsatət və etirazın hamısı "əsassız" sayılaraq rədd olundu. İstintaq prosesində ən çox işlənilən söz "əsassız" oldu. Vəsatət və etirazlarımız "əsassız" sayıldıqca, biz də ittihamı əsassız adlandırdıq. Nə isə... Keçək əsas məsələyə...

Bu günlərdə istintaq zamanı hüquqlarını müqavilə əsasında müdafiə etdiyim Cabbar Savalanlıya dövlət hesabına vəkil təyin olundum - Sumqayıt Şəhər Məhkəməsində hüquqlarını müdafiə etmək üçün. Məhkəmənin hazırlıq iclasında barəsində seçilmiş həbs qətimkan tədbirinin dəyişdirilməsinə və onun azadlığa buraxılmasına nail olmaq üçün bir neçə variant üzərində işləyirdim. Variantlardan biri də, Cabbarın Universitetinə müraciət edərək, öz tələbəsinə sahib çıxmasını, onu zaminliyə götürməsini xahiş etmək idi. Cinayət-Prosessual Məcəlləsi (CPM) buna təşkilatın zaminliyi deyir.

Eynulla Fətullayevlə Novruz Bayramı

21 Mart, 14:57-ci dəqiqə. Bir neçə saatdır ki, Azərbaycana Bahar gəlib. Hər yerdə bayram əhval-ruhiyyəsi duyulur. 1 saylı cəzaçəkmə müəssisəsinin qarşısındayam. Məhbus jurnalist Eynulla Fətullayevlə bayramlaşmağa gəlmişəm. Türmənin qarşısı qələbəlikdir. Yanlış anlamayın, mitinq-piket deyil. Bayram günü dustaq əzizlərini görməyə gələn çöhrəsi kədərli insanların izdihamıdır bu.


Əvvəlcə növbəyə dayanıram, "axırıncı kimdir" soruşuram. Kimsə axırıncı olduğunu boynuna almır. Nədənsə, bu ölkədə hamı birinci olmaq istəyir. Mən niyə axırıncı olum ki?! Xidməti vəsiqəm əlimdə birtəhər irəli keçirəm. "İndiki gənclər belədirlər, böyük-kiçik saymırlar"- orta yaşlı sarışın xanım iradını gizlətmir. "Ay xanım, o vəkildir, səbrli olun sizi də buraxacam" - dəmir qapını yarımçıq aralayan ədliyyə işçisi onun cavabını verir. "Bayram günü vəkilin türmədə nə işi, yəqin qohumunun yanına gəlib, zəhmət çəksin bizim kimi..." - dəmir qapı arxamca çırpıldığından nə dediyini eşidə bilmirəm. Yəqin ki, cümləsini yaxşı halda,"növbəyə dursun"sözləri ilə bitirəcək, pis halda isə, "gözüm aydın vəkildi, bizdən artıq deyil ki,..." şəklində davam etdirəcəkdi. Nə isə...


Görüş otağında əyləşib Eynullanı gözləyirəm. İki gün öncə, Martın 19-u da bu otaqda olmuşam. O zaman mən də "Sürpriz Novruz əfv"i olacağına və jurnalist müvəkkilimin adının da bu qədər həngamədən sonra siyahıya salınacağına ümid edirdim. Az qala Eynullanı da inandırmışdım. Sonuncu görüşümüzdə, onun "bir də nə vaxt gələcəksən" sualına yarı zarafat, yarı ciddi "Martın 20-si, ya da 21-i, səni qarşılamağa" cavabı vermişdim. İkimiz də gülmüşdük bu halımıza...


Fəqət, möcüzə baş vermədi. Bu düşüncələr içində ikən, Eynulla həmişəki gülərüz çöhrəsi ilə qapıda göründü. Salamlaşıb oturduq. Saçları kəsilib, üzü təraş olunub, əhval-ruhiyyəsi yaxşıdır. Azad medianın haray-həşirindən sonra göstərilən tibbi yardım faydasız olmayıb: aramsız öskürəkləri kəsilib, ara-sıra yüngül öskürür, əlindəki yaralar sağalıb, səpkilər yoxa çıxıb. İndi türmədə onun iki düşməni var: zirzəmidə yerləşən karser və West. Yanlış anlamayın, söhbət siqaretdən gedir.


Bir az söhbətləşir, bayramlaşırıq. Eynullanın barmaqları arasında tüstülənən siqareti Novruz tonqalına bənzədirik. Bir "tonqal" da mən yandırıram. Onu təbrik etməyə utanıram. Nə arzulayasan?! Azadlıqmı?! Bu, bayram arzusu deyil, onun doğal haqqıdır, Azadlıq! Avropa Məhkəməsi dərhal azadlığa buraxılmasına qərar verib. "Bayramın mübarək, neçə belə illərə və s." növbətçi təbrik mətnlərinin yeri deyil, axı. Əvəzində Eynulla təbrik edir, yaxınları, dostları. "Səninlə bahəm" də deyə bilmirəm. Həyəcanlı məqamlardı...


Beləcə, bu ilki Novruzumun bir neçə saatını onunla bölüşürəm.


Özünə deyə bilmədim, gec də olsa təbrik edirəm!
Bayramın mübarək, Eynulla!


21.03.2011

Свободу Эйнулле Фатуллаеву!

Со 2-го марта Эйнулла Фатуллаев живет в полуподвальных условиях, в сырости, лишенный глотка свежего воздуха. Я виделся с ним 4 часа тому назад. Он весь оброс бородой, нервы его на пределе, кашляет беспрерывно, хрипит, когда дышит, через каждую минуту отпивает глоток воды, чтобы не задохнуться. А еще и эти проклятые сигареты не дают ему покоя.


Жизнь находящегося в заключении журналиста в опасности. Эйнулла не выходит из карцера и тем самым ставит свою жизнь под угрозу. Настало время отложить все дела в сторону и задуматься об Эйнулле, писать лишь об Эйнулле, говорить об Эйнулле. Его состояние похоже на состояние военнопленных из кинофильмов! Мы должны спасти журналиста!


Спустя несколько минут после того, как прессе была передана информация о том, что Эйнулла Фатуллаев отправил личное письмо Президенту Ильхаму Алиеву, интернет-медиапространство страны переполнилось заметками под заголовком «Эйнулла Фатуллаев обратился к Президенту Ильхаму Алиеву с просьбой о помиловании». Информационные сайты, до сего дня не написавшие об Эйнулле ни строчки, радостно подхватили эту новость. На фоне будто бы «поражения» и «сдачи на милость» Эйнуллы торжество зависимой медиа вмиг охватило всю страну. Кто только не звонил мне?! Кто только на фоне этой новости не предложил взять интервью…


Однако этот восторг был кратковременным. Дружелюбные нотки в голосе счастливых журналистов, позвонивших мне для уточнения информации, пропали после моего ответа: «Пресса исказила информацию, заявления о помиловании Фатуллаев не писал».


И за неделю до этого я распространял информацию о Фатуллаеве. Я говорил о том, что во время пересылки в пенитенциарное учреждение он подвергся физическому насилию со стороны людей в масках, что он отказывается выходить на территорию «зоны» из-за опасений по поводу своей жизни и по собственному желанию содержится в карцере (место, где содержатся, – не больше 30 дней, – нарушители внутреннего распорядка пенитенциарного учреждения и те, кто совершил преступление в пенитенциарном учреждении), что его жизнь находится под угрозой. Тогда я, можно сказать, не мог сыскать портала для распространения этой информации, эта новость никого, кроме трех-четырех представителей свободной медиа, не заинтересовала.


Из пенитенциарной службы на эту новость ответили дежурными фразами: «Было проведено расследование, факты не подтвердились, адвокат занимается саморекламой, раздувает эту новость».


Давайте выдвинем нашу гражданскую позицию. Пусть каждый из нас в пределах своих возможностей откликнется на обстоятельства, сложившиеся вокруг Эйнуллы Фатуллаева. Отныне для того, чтобы Эйнулла Фатуллаев вышел на свободу, требуется не решение суда, а наше с вами волеизъявление. Давайте не забывать, что несмотря на решение Европейского Суда о «немедленном освобождении» Эйнуллы Фатуллаева, он все еще терпит незаслуженное наказание, наше наказание, твое, мое, его наказание…


Давайте быть свободными!

Eynulla Fətullayevə AZADLIQ!

Martın 2-dən bəri yarım zirəmi şəraitində, rütubətli yerdə, təmiz havadan təcrid vəziyyətdə yaşayır, Eynulla Fətullayev. Onu 4 saat bundan qabaq görmüşəm. Üz-gözünü tük basıb, əsəbləri pozulub, aramsız öskürür, xırıltılı nəfəs alır, hər dəqiqədə bir qurtum su içir ki, nəfəsi kəsilməsin.  Bir tərəfdən də zəhrimar siqaret ona aman vermir.


Məhbus jurnalistin həyatı təhlükədədir. Karserdən çıxmamaqla canına qəsd edir Eynulla. Artıq bütün işləri bir kənara qoyub Eynulla barədə düşünmək, ancaq Eynulladan yazmaq, Eynulladan danışmaq lazımdır. Onun halı filmlərdə gördüyümüz hərbi əsirlərin halına bənzəyir! Jurnalisti xilas etməliyik!


Eynulla Fətullayevin Prezident İlham Əliyevə şəxsi məktub göndərməsi  barədə mətbuata açıqlama verdikdən bir neçə dəqiqə sonra, ölkənin internet-media məkanı "Eynulla Fətullayev əfv olunması üçün Prezident İlham Əliyevə müraciət edib" başlıqlı xəbərlərlə doldu. İndiyədək Eynulladan bir cümlə də olsun yazmayan xəbər saytları sevincək bu xəbəri yaydılar. Guya Eynullanın sınması, əyilməsi xəbəri fonunda asılı medianın qələbəliyi bir anda bütün ölkəni bürüdü. Kimlər mənə zəng vurmadı?! Kimlər bu xəbər fonunda müsahibə götürmək təklifi etmədi.


Amma bu sevinc uzun sürmədi. Məlumatı dəqiqləşdirmək üçün zəng vuran xoşbəxt jurnalistlərin mənimlə mehriban danışığı da "mətbuat xəbəri təhrif edib, Fətullayev əfv ərizəsi yazmayıb" cavabından sonra dəyişdi.


Bir həftə öncə də, Eynulla Fətullayev barədə xəbər yaymışdım. Cəzaçəkmə müəssisəsinə köçürülən zaman yolda maskalı şəxslər tərəfindən fiziki zorakılığa məruz qalmasını, həyatına təhlükə olan cəzaçəkmə müəssisəsinə köçürüldüyü üçün "zon"un ərazisinə çıxmaqdan imtina etdiyini, öz arzusu ilə karserdə (cəzaçəkmə müəsisəsində daxili intizam qaydalarını pozan şəxslərin və cəzaçəkmə müəssisəsində cinayət törətmiş şəxslərin müvəqqəti - 30 gündən çox olmamaqla saxlandığı yer) saxlandığını, həyati təhlükə qarşısında olduğunu demişdim. O zaman az qala bu xəbəri yaymağa portal axtarırdım, 3-5 azad media təmsilçisindən başqa heç kimi maraqlandırmamışdı bu xəbər.


Penitensiar xidmətdən bu xəbərə növbətçi ifadələrlə cavab verilmişdi: "Araşdırılıb, fakt təsdiqini tapmayıb, vəkil özünü reklam edir, xəbəri şişirdir".


Gəlin, ortaya vətəndaş mövqeyi qoyaq. Hər birimiz öz səlahiyətlərimiz və imkanlarımız daxilində Eynulla Fətullayev ətrafında yaranmış vəziyyətə müdaxilə edək. Artıq Eynulla Fətullayevin azadlığa çıxması üçün məhkəmə qərarı deyil, iradə ifadəsi lazımdır. Gəlin, unutmayaq ki, Avropa Məhkəməsinin "dərhal azdlığa buraxılsın" qərarına rəğmən Eynulla hələ də cəza çəkir, bizim cəzamızı, sənin, mənim, onun cəzasını...


Gəlin, azad olaq!




14.03.2011-ci il.